اه من قلب تعذب بالمواجع والجروح

من قلبٍ تعذب بالمواجع والجروح
والمصيبه خِلّه اللي بالمواجع جارحه

وإن سألته ليه ودك يا بعد روحي تروح
قال ظرف ولا هقيت إني لقلبك شارحه

قمت أداري قلبي اللي من غلا خلّه ينوح
بس أشوف إن المشاعر من قراره سارحه

دون حكي ولا جدال ودون تفسير وشروح
ما أظن الروح تقبل رايه اللي طارحه

قمت أضيع بين جده بين ضحكه والمزوح
قمت أجامل والبنادق في ضميري قارحه

يا حبيبي نجمك اللي في سما قلبي يلوح
بالأمانه لا تجيه وبالعذاب اتطارحه

دام قلبي من طريقك حالف إنه ما يشوح
ليه قلبك ما يجيه وفي الخفوق ايمارحه

ودام قلبي لك تعهّد بالصراحه والوضوح
ليه قلبك ما تعهّد بالوضوح ايصارحه

ودام قلبي في وصالك يا بعد عمري لحوح
ليه قلبك والجوارح بالمفارق فارحه

ودام قلبي حالف إنه ما يفكّر في النزوح
ليه قلبك صاب قلبي بالوداع البارحه